Vendi ynë do të jetë ditën e hënë nën ndikimin e masave ajrore relativisht të qëndrueshme dhe të nxehta, duke sjellë mot kryesisht të kthjellët dhe temperatura shumë të larta në të gjithë territorin.
Sipas parashikimit, temperaturat maksimale do të arrijnë në 42°C në Elbasan, ndërsa Tirana dhe Berati do të regjistrojnë deri në 41°C. Në Fier termometri pritet të shënojë 40°C, ndërsa Gjirokastra, Vlora, Durrësi, Lezha dhe Shkodra do të përjetojnë temperatura deri në 39°C.
Moti do të jetë kryesisht i kthjellët, megjithëse gjatë orëve të mesditës dhe pasdites priten vranësira mesatare përgjatë zonave malore në veri dhe lindje të vendit.
Reshje të dobëta dhe lokale shiu parashikohen vetëm në zonat malore të veriut dhe lindjes, kryesisht gjatë mesditës dhe pasdites. Pjesa tjetër e territorit do të mbetet pa reshje.
Era do të fryjë me drejtim veriperëndim–verilindje, me shpejtësi mesatare rreth 6 m/s, ndërsa deti do të ketë valëzim të ulët, 1-2 ballë.
Autoritetet këshillojnë qytetarët të shmangin ekspozimin në diell gjatë orëve më të nxehta të ditës, të konsumojnë sa më shumë lëngje dhe të tregojnë kujdes të shtuar ndaj temperaturave ekstreme.
