Për ditën e sotme, vendi ynë do të ndikohet nga kushte atmosferike kryesisht të paqëndrueshme. Moti parashikohet që nga orët e para të 24-orëshit deri në mesditë me vranësira mesatare deri të dendura, ndërsa pas mesditës vranësirat do të shoqërohen me intervale të herëpashershme kthjellimesh, kryesisht përgjatë ultësirës perëndimore.
Reshjet e shiut do të jenë të pranishme që në orët e para të ditës deri në mesditë, herëpashershme dhe me intensitet mesatar në pjesën më të madhe të territorit, ndërsa në periudha afatshkurtra do të shfaqen në formë shtrëngatash. Pas mesditës, reshje shiu të dobëta dhe lokale priten kryesisht në zonat malore. Në zonën e Alpeve, në verilindje mbi 700–800 metra dhe në juglindje mbi 800–900 metra, reshjet do të jenë në formë dëbore me intensitet të ulët dhe lokalisht mesatar, duke sjellë reduktim të dukshmërisë.
Era do të fryjë nga juglindja në lindje me shpejtësi mesatare rreth 7 m/s, ndërsa përgjatë vijës bregdetare dhe zonave luginore do të arrijë deri në 14 m/s. Valëzimi në det do të jetë i forcës 2–3 ballë.
Temperaturat e ajrit do të shënojnë vlera minimale rreth 2 gradë Celsius, ndërsa maksimalet do të ngjiten deri në 14 gradë Celsius.
/vizionplus.tv
