Ministria ruse e Punëve të Jashtme ka reaguar ashpër ndaj misioneve ndërkombëtare, KFOR dhe EULEX, të cilët sipas saj “i vëzhguan ngjarjet si të huaj dhe nuk zbatuan mandatin e tyre”.
“Mospërfillja e treguar nga misionet ndërkombëtare në parandalimin e situatës tregon qartë se Prishtina, BE-ja dhe Shtetet e Bashkuara nuk kanë ndërmend të marrin në konsideratë të drejtat dhe interesat e serbëve dhe do të shtypin ashpër përpjekjet e tyre për të mbrojtur interesat e tyre legjitime. Kjo linjë jashtëzakonisht e rrezikshme është e mbushur me përsëritjen e përleshjeve të armatosura në Kosovë dhe destabilizimit në Ballkan në përgjithësi”.
Reagimi i Moskës vjen menjëherë pasi SHBA dënuan ngjarjet në Mitrovicë dhe bënë thirrje që palët të shmangin përshkallëzimin e mëtejshëm të situatës, si dhe të veprojnë me qetësi për t’i zgjidhur mosmarrëveshjet me dialog.
Nga ana tjetër, krerët e 10 komunave me shumicë serbe në Kosovë janë takuar në vendin ku u arrestua Marko Gjuric. Ata kanë prezantuar logon përfaqësuese të bashkimit e cila i ngjan simbolit serb me katër C, që ka kuptimin “Vetëm Uniteti Shpëton Serbët”. Lista Serbe është treguar e vendosur se komunat do të formojnë asociacionin deri më 20 prill. Lideri i partisë Goran Rakiq, ka thënë se bashkasia nuk është kundër askujt por do të jetë shërbim për të gjithë banorët në Kosovë dhe nëse Prishtina nuk ka ndërmend ta bëjë kjo nuk do ti pengojë dot ata.
