Studentët e mjekësisë kundërshtojnë në mënyrë kategorike punësimin e detyruar pas diplomimit dhe shprehen të zhgënjyer që pas vendimit të gjykatës Kushtetuese, askush nuk është konsultuar me të rinjtë për të reflektuar në projektligj ndryshimet e kërkuara.
“Nuk është kjo mënyra për të mbajtur mjekët në vend ndërkohë që problemet në sistemin e arsimit dhe shëndetësisë janë të dukshme. Askush nuk është konsultuar me ne si mund të bëhet më mirë. Ne jemi injoruar në vazhdimësi dhe në këto kushte do të ndjekim rrugët ligjore”, u shpreh studenti i mjekësisë, Mikel Seferi.
“Ne do të përdorim të gjitha format që kemi në dorë, për të arritur tek ajo që është e drejtë, jo vetëm për mjekët e rinj por edhe ata që do të vijnë”, tha Arlind Hafizi, po ashtu student.
Ministria e arsimit dhe sportit pak ditë më parë paraqiti për konsultim publik një projektligj që sipas saj plotëson vakumin ligjor të krijuar në ligjin “Për trajtimin e veçantë të studentëve që ndjekin programin e integruar të studimit të ciklit të dytë “Mjekësi e Përgjithshme” në institucionet publike të arsimit të lartë”.
Ndryshimet e propozuara mbështeten në vendimin e Gjykatës Kushtetuese, në janar të këtij viti dhe do kalojnë parlamentit për miratim. /vizionplus.tv
