Tiranë, 24 shkurt 2026 – Gjykata e Posaçme e Shkallës së Parë për Korrupsionin dhe Krimin e Organizuar ka shpallur fajtorë Klajdi Zhillën dhe Geraldo Fuçijan për veprën penale “Korrupsioni pasiv i personave që ushtrojnë funksione publike”, në bashkëpunim, duke i dënuar përfundimisht me nga dy vite burgim secilin.
Çështja u gjykua me procedurën e gjykimit të shkurtuar, pas kërkesës së paraqitur nga Prokuroria e Posaçme kundër Korrupsionit dhe Krimit të Organizuar (SPAK), në kuadër të procedimit penal nr. 12/1 të vitit 2024. Fillimisht, gjykata caktoi nga tre vite burg për secilin prej të pandehurve, por për shkak të gjykimit të shkurtuar, dënimi u ul me një të tretën, duke zbritur në dy vite burgim.
Trupi gjykues i përbërë nga gjyqtarët Rudina Palloj, Flojera Davidhi dhe Bib Ndreca vendosi pezullimin e ekzekutimit të dënimit me burgim dhe vënien e të dyve në provë për një periudhë dyvjeçare. Gjatë kësaj kohe, ata nuk duhet të kryejnë vepër tjetër penale dhe duhet të mbajnë kontakte me Shërbimin e Provës që mbulon vendbanimin e tyre.
Po ashtu, gjykata vendosi heqjen e së drejtës për të ushtruar funksione publike për një periudhë pesëvjeçare për secilin prej tyre.
Me vendim të posaçëm u hoq masa e sigurimit “arrest në burg” dhe u urdhërua lirimi i menjëhershëm i të pandehurve nga paraburgimi.
Kundër këtij vendimi mund të bëhet ankim në Gjykata e Apelit kundër Korrupsionit dhe Krimit të Organizuar brenda 15 ditëve nga njoftimi i vendimit të arsyetuar.
Zhilla dhe Fuçija u arrestuan gjatë një operacioni të SPAK në vitin 2025. Punonjësit e IMT-së u kallëzuan nga vetë pronari i një lokali, se i kishin ofruar një marrëveshje që të mos ia prishnin tendën, kundrejt 1 mijë eurove./vizionplus.tv
