Mungesa prej 10 ditësh e mjekut të familjes në lagjen 1 të qytetit të Korçës ka krijuar konfuzion te pacientët, sidomos ata kronikë, të cilët nuk arrijnë të marrin dot medikamentet me rimbursim.
Prej ditësh ata janë të detyruar të presin një zgjidhje nga ana e institucioneve kompetente, pasi mjekut të familjes që punonte në këtë qendër i ka përfunduar kontrata gjashtë mujore me të cilën i ishte shtyrë afati për të dalë në pension.
Qytetarët kërkojnë një zgjidhje përfundimtare, pasi një mjeke e cila vjen vetëm dy ditë në javë në këtë qendër nuk arrin të përballojë fluksin e madh të pacientëve që kërkojnë të marrin ilaçet.
Sonila Pula është mjekja e familjes e cila mbulon lagjet 2 dhe 3 të qytetit të Korçës.
Në mungesë të mjekut në lagjen 1 ajo duhet të përballojë edhe fluksin e pacientëve të kësaj lagjeje. Mjekja shprehet se ngarkesa është tepër e madhe dhe e vështirë për tu përballuar.
Të interesuar pranë Njësisë vendore të Kujdesit Shëndetësor në Korçë, drejtori Mikel Llogori thotë se deri në datën 15 do të priten aplikimet në portalin “Mjekë për Shqipërinë” dhe në rast se nuk do të ketë interes nga ana e mjekëve të rinj mund të procedohet përsëri me shtyrjen e kontratës me mjekun pensionist në këtë qendër.
Në lagjen 1 të qytetit të Korçës janë rreth 3000 pacientë në total, 750 prej të cilëve janë të sëmurë kronikë të cilët janë të detyruar të shkojnë çdo muaj pranë mjekut të familjes për të marrë medikamentet e duhura, çka shkakton një ngarkesë të madhe e cila rritet edhe më tepër në kushtet e mungesës së një mjeku të qendrueshëm çdo ditë të javës.
