Kthimi i sulmuesit Nejmar në radhët e Brazilit para Kupës së Botës u prit me një festë popullore nga tifozët e “seleçao”. Por gjërat nuk po shkojnë ashtu siç pritej me futbollistin.
Ky i fundit udhëtoi me helikopter drejt grumbullimit të ekipit kombëtar për përgatitjet e Kupës së Botës, nuk mori pjesë në asnjë seancë stërvitore këto ditë si dhe i është nënshtruar kontrolleve të njëpasnjëshme mjekësore për dëmtimin e tij. Sot, mjeku i ekipit kombëtar, Rodrigo Lasmar, dha lajmin më të keq të mundshëm për futbollistin.
Ai bëri të qartë para mediave se Nejmar kishte një dëmtim muskulor të gradës së dytë, ishte në terapi intensive për rikuperimin, por ai do të kërkonte kohë. “Rikuperimi shkon nga 2 në 3 javë”, u bë e qartë nga stafi i Brazilit, për rastin më të mirë të mundshëm.
Kjo do të thotë se Nejmar praktikisht do të humbasë të gjitha përgatitjet me ekipin në këto ditë, nuk do luajë në miqësoret e përgatitura para turneut, si dhe nuk pritet të jetë i gatshëm në ndeshjet e Botërorit ndaj Marokut dhe Haitit. Me shumë mundësi, nëse do të riaftësohet, mund të jetë në gjendje të luajë që nga ndeshja e tretë në grup ndaj Skocisë.
Kjo vendos Ançelotin para një dileme të madhe, pasi nuk e di të sigurt nëse do të ketë Nejmar në dispozicion gjatë turneut. Ndaj në Brazil nuk përjashtojnë mundësinë që ai të vendosë të bëjë ndryshime në listë e lërë jashtë futbollistin e njohur duke e zëvendësuar brenda afateve që i lejon FIFA për raste të tilla.
