Kryeministri i Greqisë, Kyriakos Mitsotakis i kërkoi Bashkimit Evropian që të veprojë shpejt për pasaportën e vaksinimit. Gjatë një telekonference me vendet anëtare të BE, shefi i qeverisë greke tha se nëse BE nuk e bën diçka të tillë, sektori privat do të fillojë të lëvizë.
“Nëse nuk e bëjmë ne si BE, dikush tjetër do ta bëjë atë, me shumë gjasë kompanitë e mëdha të teknologjisë. Unë jam pro regjistrimit të sa më pak të dhënave personale nga qytetarët. Pasaporta e vaksinimit nuk do të jetë ekuivalente me një pasaportë shëndetësore, por përkundrazi do të hapë një korsi të shpejtë për udhëtim, pa kufizimet e shkaktuara nga testet për koronavirusin dhe pa karantinën e detyrueshme.”
Nga ana tjetër, ai vlerësoi edhe mesazhet që ka përcjellë Blloku Evropian ndaj kompanive të vaksinave, për respektimin e angazhimeve që kanë marrë në prodhimin dhe shpërndarjen e vaksinave.
