Në dëshminë e dhënë prej tij, ushtari që i mbijetoi rrëzimit të helikopterit, tha për hetuesit se ende nuk e ka të qartë se përse ndodhi aksidenti, pasi ata po fluturonin në kuotë të ulët mbi liqenin e Shkodrës. Oficerë të policisë gjyqësore nuk kane arritur të marrin të plotë dëshminë e Baramuces për shkak të gjendjes së shokut ne të cilën ndodhet ushtaraku, por ai u tha atyre se në momentin e rënies nuk pati sinjal alarmi apo avarie. Nga ana tjetër, Prokuroria e Shkodrës ka mbledhur të gjitha dëshmitë e banorëve të zonës të cilët dhanë ndihmën e pare. Ndërkohë pritet nxjerrja e mjetit fluturues nga liqeni për të vazhduar ekspertizat teknike, të cilat sipas hetuesve do të përcaktojnë shkakun e vërtete të rrëzimit. Të vetmit që kanë qëndruar pranë helikopterit kanë qenë efektivët e policisë kufitare, të cilët nuk kanë lejuar mjetet e tjera motorike për t’iu afruar vendit të ngjarjes. Sipas banorëve në këtë zonë bëhen stërvitje të tilla, por asnjëherë në nivele aq të ulëta. Nga ana tjetër Ministria e Mbrojtjes publikoi dhe itinerarin zyrtar të ndjekur nga helikopteri. Nisja është bërë nga Farka në orën 12:10 në një fluturim rutinë stërvitor rikonjicioni. Dyshimet se ai ishte ulur në pikën kufitare të Hanit të Hotit pak para se të rrëzohej u hodhën poshtë nga pamjet dhe fotot, sipas të cilave bëhej fjalë për një tjetër helikopter civil dhe jo të forcave të armatosura. Një ditë më parë ish-kryeministri Berisha nëpërmjet një postimi në rrjetin social Fcb pretendoi se helikopteri i forcave të armatosura po transportonte mermer, ndërkohe qe nga pamjet e publikuara doli se nuk bëhej fjalë për të njëjtin mjet fluturues. Helikopteri që u ul në pikën kufitare të Hanit të Hotit është i pajisur me rrota, ndërkohë që helikopteri i rrëzuar mesditën e së mërkurës me sistemin slitë.
