Komisioni Statutor në Partinë Demokratike miratoi, ashtu siç pritej, propozimet e Lulzim Bashës për rregullat bazë të partisë më të madhe të opozitës.
Draftet e tjera të propozuara nga Edith Harxhi e Fatbardh Kadilli e që parashikonin edhe largimin e kryetarit në rast se humbet zgjedhjet, u hodhën poshtë.
Por ndryshe nga shumica e anëtarëve të komisionit, Enno Bozdo, i cili beson se Partia Demokratike ka nevojë për një ndryshim të thellë, kërkoi që debati politik për Statutin dhe të ardhmen e PD të zhvillihet në Kryesi e të mos mbyllej në komision.
ENNO BOZDO
ANETAR I KRYESISE
“Propozimet ndahen në dy grupe ato që rregullojnë statutin aktual dhe që janë të vlefshme për një harmonizim më të të mirë ku janë krijuar problemet dhe propozime e Fatbardh Kadillit që e rikonceptojnë PD, të gjitha këto propozime janë politike dhe të gjitha duhet t’i kalonin kryesisë. Unë mendoj se të gjitha propozimet politike kanë vlerë dhe nuk mund të hiqet nga tavolina.”
Vetë kryetari Basha propozoi një draft për ndryshimet në Statutin e partisë të cilat nuk sjellin risi, por rregullojnë momente të caktuara në dokumentin bazë të PD. Edith Harxhi kërkoi disa ndërhyrje që lidhen me dorëheqjen e kryetarit kur humbet zgjedhjet, më shumë kompetenca për Këshillin Kombëtar, rregullime në lidhje me anëtarësinë e partisë.
Fatbardh Kadilli kërkoi një rikonceptim të Partisë Demokratike, duke sjellë konceptin e kryetarit shumë të fortë por që mban përgjegjësi për rezultatin në zgjedhje duke u larguar. Gjithashtu Kadilli solli idenë e britanikëve për qeveri në hije e vendimmarrje të anëtarësisë për deputetët e krerët e bashkive.
