Ministrja e re e Arsimit, Evis Kushi e konsideron një përgjegjësi të jashtëzakonshme detyrën që iu besua, ndërsa zotohet se do të punojë çdo ditë me përkushtim të lartë.
Përmes një postimi në “Facebook”, Kushi thekson mes të tjerash se prejardhja nga Elbasani ia shton më shumë vullnetin që t’i çojë akoma më përpara reformat e ndërmarra deri tani.
“Detyra e Ministrit të Arsimit, Sportit dhe Rinisë është një përgjegjësi e jashtëzakonshme, për të cilën do të punoj çdo ditë për ta kryer me integritetin dhe përkushtimin tim më të lartë. Prejardhja nga Elbasani, i mirënjohur edhe si kryeqendër e arsimimit të shqiptarëve me “Normalen” e tij të famshme, ma shton edhe më shumë vullnetin që me përvojën time shumëvjeçare në arsim, të çoj akoma më përpara reformat e ndërmarra deri tani, si dhe të jem kurdoherë dëgjuesi dhe zëri i çdo nxënësi, mësuesi, studenti dhe akademiku”, shkruan ministrja.
Evis Kushi u betua pak më parë para presidentit Ilir Meta. Ceremonia u zhvillua në Presidencë.
