Ministri i Bujqësisë dhe Zhvillimit Rural, Andis Salla, bëri të ditur se me nisjen e vitit të ri shkollor, Autoriteti Kombëtar i Ushqimit ka intensifikuar kontrollet në mensat e shkollave, kopshteve dhe çerdheve, si dhe në subjektet ushqimore pranë institucioneve arsimore.
“Fokusi ynë është i qartë: të garantojmë që ushqimi që konsumojnë fëmijët tanë të jetë i sigurt dhe që çdo operator ushqimor të respektojë me rigorozitet kërkesat dhe standardet e sigurisë ushqimore”, u shpreh Ministri Salla.
Vetëm gjatë javës së fundit janë kryer 75 inspektime, ndërsa janë marrë edhe mostra për analiza laboratorike. Në çdo rast ku janë konstatuar mangësi apo shkelje, janë marrë masat përkatëse.
Ministri theksoi se kontrollet nuk do të kufizohen vetëm në periudhën e nisjes së shkollës, por do të vijojnë përgjatë gjithë vitit shkollor, me vëmendje të veçantë ndaj subjekteve që ofrojnë ushqim për fëmijët.
Duke e lidhur sigurinë ushqimore me mirëqenien dhe zhvillimin e fëmijëve, Salla nënvizoi se një shkollë më e mirë nuk lidhet vetëm me atë që nxënësit mësojnë në klasë, por edhe me mjedisin ku rriten, kujdesin që marrin dhe sigurinë e ushqimit që konsumojnë.
“Mesazhi ynë është i qartë: për sigurinë ushqimore të fëmijëve tanë nuk ka kompromis. AKU do të vijojë të jetë e pranishme në terren, të kontrollojë dhe të marrë masa sa herë që standardet nuk respektohen”, përfundoi Ministri Salla.
/vizionplus.tv
