Miliona karkaleca kanë pushtuar jugun e Rusisë, duke mbuluar rrugët, errësuar qiellin dhe shkaktuar dëme të mëdha në tokat bujqësore të Republikës së Dagestanit.
Tufat gjigante të insekteve kanë përfshirë distriktin Kizlyar, ku dendësia e tyre ka ulur ndjeshëm shikueshmërinë në rrugë, duke krijuar rrezik për drejtuesit e automjeteve. Pamjet e publikuara në rrjetet sociale tregojnë makina të rrethuara nga miliona karkaleca, ndërsa qielli mbushet me insektet që fluturojnë gjithandej.
Shumë përdorues në rrjetet sociale e kanë krahasuar fenomenin me “dhjetë plagët e Egjiptit” të përshkruara në Bibël, duke e cilësuar skenën si “apokaliptike” dhe “biblike”.
Përveç problemeve në qarkullim, karkalecat po përhapen me shpejtësi në sipërfaqe të mëdha bujqësore, duke rrezikuar të mbjellat. Sipas Organizatës së Kombeve të Bashkuara për Ushqimin dhe Bujqësinë (FAO), karkalecat ushqehen me gjethe, lule, fruta, fara, kërcell dhe lëvore bimësh, duke shkaktuar dëme të mëdha në bujqësi dhe kullota.
A huge swarm of locusts has descended on Kizlyar district in Dagestan, Russia.
Millions of them have filled the air, making visibility almost impossible for drivers. Authorities are using aircraft and ground equipment to treat affected farmland as the swarm moves through the… pic.twitter.com/b6y5AIBTZw
— Volcaholic 🌋 (@volcaholic1) August 4, 2026
Megjithëse nuk sulmojnë njerëzit apo kafshët dhe nuk transmetojnë sëmundje, numri i tyre i madh mund të krijojë situata të rrezikshme në zonat e banuara dhe në rrugë.
Autoritetet ruse kanë angazhuar avionë dhe mjete spërkatëse tokësore për të frenuar përhapjen e tufave, por operacioni është vështirësuar pasi karkalecat shumohen fillimisht në zona natyrore të mbrojtura, ku përdorimi i pesticideve është i ndaluar.
Ministria e Bujqësisë dhe Ushqimit e Republikës së Dagestanit bëri të ditur se operacionet po zhvillohen si nga ajri ashtu edhe nga toka. Megjithatë, autoritetet pranojnë se fushat bujqësore do të mbeten të rrezikuara për sa kohë që tufat vazhdojnë të dalin nga rezervatet natyrore.
Shenjat e para të kësaj vale u konstatuan që në muajin maj, kur inspektimet zbuluan karkalecat e parë në veri të Dagestanit. Pavarësisht paralajmërimeve të hershme, pushtimi i insekteve është përhapur me shpejtësi, duke detyruar autoritetet të vijojnë betejën për të kufizuar dëmet në bujqësi.
/vizionplus.tv
