Pas barazimit me Juventus, Milan është rikthyer te fitorja duke mposhtur Venezia-n 2-0 në San Siro. Duke marrë parasysh që përballë kishte një skuadër modeste dhe me diferenca në organikë, Pioli vendosi të startojë me disa prej lojtarëve të stolit, por që nuk arritën të krijojnë raste të rrezikshme për të zhbllokuar rezultatin. Në këtë situatë, tekniku i kuqezinjve u detyrua të bënte zëvendësimet në pjesën e dytë për të dalë me tre pikë nga ky takim.
Ishte pikërisht, Theo Hernadez, protagonisti kryesor në fitoren e Milanit. Francezi, fillimisht asistoi për Brahim Diaz, i cili shënoi në minutën e 68’ ndërsa në të 82’-ën mbrojtësi i majtë gjeti rrjetën duke përmbyllur sfidën në 2-0.
Ndërkohë më herët, Juventusi arriti të marrë fitoren e parë në kampionat pas pesë javësh, duke mposhtur Spezian 3-2 në transfertë. Në takimet e tjera, Empoli i Nedim Bajramit fitoi 2-0 ndaj Cagliarit në transfertë, ndërsa Salernitana dhe Verona u ndanë në barazim 2-2. Pas këtyre rezultateve, Inter dhe Milan ndajnë kreun me nga 13 pikë, një më shumë se Napoli i vendit të tretë i cili do të luajë nesër përballë Sampdorias në transfertë.
Sfidat u transmetuan ekskluzivisht në platformën Tring.
