Meta ultimatum Ramës: Lëri lojërat me Kodin Zgjedhor, je i dëshpëruar
Presidenti Ilir Meta kërkoi nga kryeministri Edi Rama të mos bëjë lojëra me Kodin Zgjedhor. Ai bëri thirrje që të mos ndryshohet marrëveshja e 5 qershorit. Sipas Metës, mazhoranca e ka këtë sjellje sepse nuk do të hapë listat nga frika.
“Të lërë lojërat me Kodin, të zbatojë marrëveshjen e 5 qershorit. E vetmja gjë që ai mund të bëjë është të respektojë listat e hapura. Unë ju garantoj se ai nuk e bën këtë gjë. Ai do të prishë marrëveshjen e 5 qershorit sepse është i dëshpëruar pse opozita firmosi dhe nuk kishte kujt t’ja linte fajin më. Ai nuk i do listat e hapura sepse PS i del jashtë kontrollit sepse do të votojnë socialistët dhe jo oligarkët. Ai me lista të hapura në asnjë qark të Shqipërisë nuk del deputet.”
Presidenti shtoi se për interesin e shqiptarëve është të hapen listat 100% sepse kjo forcon parlamentarizmin. Nëse do të shkelet 5 qershori, atëherë përgjegjësinë për çdo gjë Ilir Meta do të lërë tek ata që do ta shkelin. Ai tha se do ta konsiderojë këtë një atentat dhe një përpjekje për të instaluar përfundimisht një grusht shteti apo një juntë në Shqipëri.
