Partia Demokratike reagoi pas vendimit të Parlamentit për të shkarkuar presidentin Ilir Meta. Selia blu e konsideroi këtë një akt antikushtetues dhe thirrja e saj shkon për Gjykatën Kushtetuese. Sipas PD-së, gjyqtarët e Kushtetueses duhet të refuzojnë vendimin e Parlamentit.
“Sulmi antikushtetues i Parlamentit ilegjitim mbi Institucionin e Presidentit të Republikës është akt që thellon edhe më shumë tiparet antidemokratike të regjimit Rama-Doshi. Ky akt vjen menjëherë pas masakrës zgjedhore dhe grabitjes më të madhe të votave të kryer ndonjëherë. Përfaqësuesit e krimit të organizuar në Kuvendin njëpartiak të Shqipërisë nuk mund të jenë kurrë garant të Kushtetutës dhe as nuk mund të marrin vendime në emër të saj. Edi Rama ka përdhosur me qindra herë Kushtetutën e Shqipërisë dhe është ekspozuar përpara çdo shqiptari si armik i demokracisë dhe shtetit ligjor. Partia Demokratike e konsideron antikushtetues vendimin e Kuvendit njëpartiak për shkarkimin e Presidentit të Republikës dhe kërkon nga Gjykata Kushtetutese të ruajë paanësinë dhe të garantojë pavarësinë e institucioneve kushtetuese, duke refuzuar farsën për shkarkimin e Presidentit të Republikës.”
Për herë të parë në historinë e Shqipërisë, 104 deputetë ngritën kartonët për të shkarkuar presidentin Meta për shkelje të rëndë të Kushtetutës. Brenda 5 ditëve ky vendim i Parlamentit do të shkojë në Gjykatën Kushtetuese e cila vendos përfundimisht fatin e Ilir Metës.
