Meta takon ambasadorin Arvizu

Reforma në drejtësi, lufta kundër korrupsionit dhe krimit të organizuar ishte në fokus të takimit që kryeparlamentari Meta mbajti me zv/Ndihmës Sekretarin Amerikan për Çështjet e Trafikut Ndërkombëtar të Lëndëve Narkotike, Aleksandër Arvizu. Gjatë këtij takimi, zyrtari i lartë amerikan, ish-ambasador në Shqipëri, vlerësoi miratimin me konsensus të ndryshimeve kushtetuese për reformimin ne drejtësi. Ai shprehu mirënjohjen e SHBA për rolin negociues që luajti kreu i Parlamentit Meta për votimin e kësaj reforme. Nga ana e tij, Meta deklaroi se reforma duhet të shoqërohet me dekriminalizimin e plotë të politikës dhe institucioneve shqiptare. Dy zyrtarët nënvizuan rëndësinë për thellimin e bashkëpunimit edhe në luftën ndaj krimit të organizuar dhe narkotrafikut.