Në Ditën Ndërkombëtare të Paqes, Presidenti Meta ka shpërndarë një mesazh në rrjetet e tij sociale.
Duke përdorur edhe porositë e Nene Terezës në këtë rast, kreu I shtetit shkruan se nuk mund të ketë paqe nëse nuk respektohen liritë dhe të drejtat e njeriut e nëse grykësia për pushtet e pasuri, prevalon mbi interesin e përbashkët.
Paqja nuk është e dhënë njëherë e përgjithmonë!
Paqja fitohet me shumë mund dhe sakrifica, deri edhe sublime.
Paqja është po aq e vështirë të ruhet dhe të mbrohet, po aq sa mund të fitohet.
Nuk mund të ketë paqe nëse nuk respektohen të drejtat dhe liritë themelore të njeriut, nëse egoja, ambicja, interesi i ngushtë personal, si dhe grykësia për pushtet e pasuri, prevalon mbi interesin e përbashkët.
Paqja e sigurtë, afatgjatë dhe e qëndrueshme garantohet vetëm kur liritë, të drejtat, aspiratat dhe nevojat e qytetarëve, mbrohen përmes sundimit të shtetit të së drejtës.
Meta thotë se Shqipëria dhe vendet e tjera përreth duhet të bëjnë cmos që të ruajnë paqen dhe stabilitetin në një rajon që ka një të kaluar problematike mes masakrash dhe luftrash të rënda.
Në rajonin tonë, kujtimet e hidhura, dhimbjet, vuajtjet dhe pasojat e rënda që lanë pas luftrat, masakrat, genocidet dhe regjimet diktatoriale janë ende të freskëta.
E kaluara kur harrohet, rrezikon të përsëritet!
Duhet të jemi shumë vigjilentë ndaj çdo tentative që do të mund të cenonte sovranitetin, paqen, qetësinë, mirëkuptimin, respektin reciprok dhe bashkëjetesën mes njerëzve, popujve, kombeve, etnive dhe besimeve, duke synuar mbjelljen e farës së paragjykimeve, ndenjës së urrejtjes dhe autoritarizmit, veçanërisht nga keqpërdorimi i shtetit për përfitime personale dhe të pushtetit.
Në zemër të NATO-s, është demokracia. Si anëtare e saj, Shqipëria duhet të vijojë me dinjitet, angazhimin për ruajtjen e paqes, sigurisë e stabilitetit kudo në botë, në radhë të parë duke dhënë shembullin e vet, jo vetëm për ruajten e e vlerave dhe parimeve që përfaqëson kjo Aleancë, por edhe duke vijuar të jetë shembull për rolin e saj si faktor kyç i paqes dhe stabilitetit në Ballkan.
