Pas paralizimit të punës në aeroportin e Rinasit, Presidenti Ilir Meta kërkoi nga Kontrolli i Lartë i Shtetit të auditojë shoqërinë Albcontrol. Në një njoftim për mediat, Meta tha se duhet parë sesi është menaxhuar kjo shoqëri dhe si janë përdorur fondet publike.
“Të fillojë pa vonesë një auditim të plotë në shoqërinë “Albcontrol” mbi: mënyrën e menaxhimit të kësaj shoqërie; respektimin e dispozitave ligjore në vendimmarrjet e organeve drejtuese; përdorimin e fondeve publike; respektimin e procedurave në marrëdhëniet e punës, si dhe çdo aspekt tjetër që paraqet rrezik për veprimtarinë e sigurt dhe funksionimin normal të “Albcontrol”.”
Duke garantuar se është shumë i vëmendshëm ndaj situatës, kreu i shtetit shprehu gatishmërinë për të thirrur një tryezë dialogu mes palëve që të gjejnë një zgjidhje përfundimtare.
“Presidenti i Republikës u bën thirrje për reflektim të gjithë aktorëve të përfshirë dhe është i gatshëm në çdo moment të thërrasë urgjent një tryezë për një zgjidhje sa më të shpejtë dhe të arsyeshme.”
