Meta: Hetim ndërkombëtar për reformën në drejtësi, maskat kanë rënë

Si për Teatrin Kombëtar, presidenti Ilir Meta kërkon një hetim ndërkombëtar edhe për zbatimin e reformës në drejtësi.

I pyetur nga gazetarët në një konferencë për shqetësimin e ambasadores amerikane se po tentohet të vritet reforma në drejtësi, Meta ra dakord me të kur përmendi lojëra.

“Unë kam 4 vjet që them stop lojërave me reformën në drejtësi dhe ambasadorja ka shumë të drejtë sepse ka 4 vjet që shohim vetëm lojëra. Shqetësimi është i drejtë sepse aktorët politikë kanë luajtur me këto çështje. Presidenti nuk është aktor politik, por krytear shteti. Dhe ka qenë gjithmonë në krye të detyrës së tij edhe përsa i takon reformës në drejtësi. Dhe nuk ka surprizuar askënd as partnerët vendas, dhe as ndërkombëtarët. Për çdo akt që presidenti ka ndërmarrë, ka kërkuar bashkëpunimin e të gjithëve dhe ju e dini sesa lojëra janë bërë dhe janë zhvilluar. Unë përsëri jam i gatshëm që të ballafaqohen të gjithë aktorët për të parë se kush ka bërë dhe vazhdon të bëjë lojëra me reformën në drejtësi. Do të kërkoj hetim edhe për zbatimin e reformës në drejtësi. Ilir Meta është ballëlartë sepse çdo veprim të tijin e ka mirëdokumentuar.”

Sipas kreut të shtetit, Yuri Kim nuk mund ta ketë fjalën për të personalisht kur flet për marrëveshje të fshehta.

“Maskat e reformës kanë rënë tani. Përgjegjësinë ta mbajnë ata që i bëjnë lojëra popullit shqiptar. Vetëm për Ilir Metën nuk mund ta kishte ambasadorja. Unë e kam takuar shumë herë ambasadoren, më shumë seç kam takuar çdo ambasador amerikan në Shqipëri, por asnjëherë nuk ju kam lajmëruar që erdhi ambasadorja apo nuk erdhi.”