Meta apel për protestë paqësore: Ka pasur akte dhune të papranueshme
Disa orë para nisjes së protestës se 6 të madhe të opozitës, ka reaguar presidenti Meta. Ai tha se protestat janë forma e duhur e reagimit qytetar në vend të largimi nga vendi.
Por kreu i shtetit bëri apel që ato të jenë tërësisht paqesore ndryshe nga të kaluarat ku janë vënë re akte dhune të papranueshme. Kjo sipas Metës është përgjegjësi edhe e liderve politik.
“Në prag të protestës kombëtare të thirrur sot në mbrëmje nga drejtuesit e Opozitës së Bashkuar, duke shprehur bindjen se tubimet paqësore e demokratike, janë një e drejtë fondamentale e demokracisë, legjitime e kushtetuese, dua të theksoj se sa e rëndësishme është që ajo të jetë tërësisht paqësore. Si President i Republikës kam qenë dhe jam i bindur se është më mirë që shqiptarët të protestojnë për të drejtat e tyre dhe të kërkojnë një Shqipëri më të mirë dhe gjithëpërfshirëse, se sa të largohen nga vendi. Në protestat e mëparshme, pavarësisht nga përkrahja qytetare, janë vërejtur disa akte dhune të papranueshme, ndaj dua t’ju kujtoj se drejtësia e kauzës tuaj, nuk duhet të cënohet nga veprime të papërmbajtura të individëve të caktuar.
Është përgjegjësi e udhëheqësve të Opozitës së Bashkuar për mbarëvajtjen e protestave ku ata ftojnë qytetarët të marrin pjesë. Vetëm në këtë mënyrë, kauza juaj për një demokraci të vërtetë, që garanton një bashkëjetesë të gjerë qytetare, legjitimitet e funksionalitet të institucioneve, do të dëgjohet më mirë brenda dhe jashtë vendit. Protestat e vazhdueshme të opozitës kanë pasur vëmendjen dhe janë transmetuar nga mediat më të njohura botërore, por imazhet tërësisht paqësore të protestës suaj do t’i shërbejnë më mirë të ardhmes europiane të Shqipërisë.”
Kjo është hera e parë që Meta bën apel të tillë para nisjes së protestes. Ky qëndrim shkon në koherence me deklaratat e bashkëshortes së tij që drejton LSI, Kryemadhi e cila kërkoi shmangien e dhunës.
