“Mësuesja më njoftoi se po konfliktoheshin në tualet”, oficerja e sigurisë tregon bisedën me Mario Përlleshajn dhe Martin Canin para ngjarjes tragjike

Në Gjykatën e Tiranës kanë dëshmuar sot tre zyrtarë lidhur me ngjarjen tragjike në shkollën “Fan Noli”, ku humbi jetën nxënësi Martin Cani.

Në seancën që u zhvillua me dyer të mbyllura, për shkak të moshës së mitur të të akuzuarit Mario Përlleshaj, por edhe të viktimës, dëshmoi oficerja e sigurisë Jetmira Kuka. Ajo tregoi se mësuesja Klodiana Saliasi e kishte informuar për disa nxënës që po konfliktoheshin me tone të larta në tualet.

“Shkova të shikoja, por ata nuk ishin më aty. Më pas thirra nxënësin Martin Cani, i cili më tha se kishte folur me zë të lartë dhe e kishte sharë në tërësi. Por aty këtë gjë e kishte marrë personale Mario dhe kishin bërë debat. Thirra Marion dhe më shpjegoi se nuk kishte asnjë problem mes tyre dhe se ishin në rregull”, tha ajo.

I akuzuari nuk ishte i pranishëm në seancë, ndërkohë që gjyqi u shty për në datën 14 korrik .

Gjyqtarja Marinela Osmani ka vendosur t’a njoftojë sërish 14 vjeçarin mbasi pritet që ai të pyetet ose të refuzojë kërkesën për tu pyetur.

/vizionplus.tv