Drejtoria e Përgjithshme e Arsimit Parauniversitar ka reaguar menjëherë pas denoncimit të bërë nga Partia Demokratike se në shkollën “Emin Duraku” janë infektuar me COVID 8 mësues, ndërsa janë karantinuar 20 të tjera.
Përmes një njoftimi të publikuar në “Facebook”, drejtoria në fjalë informon se mësimi po vijon normalisht dhe se mësuesit e prekur me koronavirus janë zëvendësuar, në mënyrë që procesi mësimor të vijojë pa ndërprerje.
“Në lidhje me shkollën 9-vjeçare “Emin Duraku” në kryeqytet, dëshirojmë t’ju informojmë se mësimi në këtë shkollë po vijon normalisht. Për shkak se disa mësues kanë rezultuar me COVID-19 dhe disa të tjerë janë karantinuar, nga ana e DPAP dhe zyrës arsimore vendore Tiranë janë marrë masat e menjëhershme për zëvendësimin e tyre në mënyrë që mësimi të vijojë pa ndërprerje. Njëkohësisht, është shtuar edhe numri i psikologëve për të qenë sa më pranë nxënësve e mësuesve me shërbimin psiko-social.”
Sa i përket dezinfektimit, theksohet se është kryer 3 herë gjatë gjithë javës së shkuar.
“Ndërkohë, procesi i dezinfektimit në këtë shkollë është kryer 3 herë gjatë gjithë javës së shkuar, teksa dezinfektimi më i fundit është realizuar ditën e djeshme. Duam të sigurojmë prindërit e të gjithë opinionin publik se ne po punojmë intensivisht që jo vetëm në këtë shkollë por në të gjithë vendin, ambientet e shkollave tona të jenë të sigurta, me higjienizim të vazhdueshëm, me masa që respektohen e me nivel të lartë ndërgjegjësimi nga ana e nxënësve, mësuesve dhe gjithë stafit të shkollave.”
