Rektori i Universitetit të Tiranës, Artan Hoxha ka komentuar vendimin e Komitetit të Ekspertëve për vijimin e mësimit online.
Në një lidhje direkte me edicionin e lajmeve në “Vizion Plus”, Hoxha theksoi se Universiteti i Tiranës është pregatitur, pavarësisht vështirësive që krijon procesi mësimor online.
Hoxha sqaroi se është ngritur edhe një grup pune për zhvillimin e një strategjie për forcimin dhe përmirësimin e proceseve mësimore.
“E shikoj si një përpjekje për të ruajtur shëndetin e qytetarëve, në veçanti të studentëve dhe stafeve të universiteteve. Në kushtet që shohim, shifrat e zhvillimit të sëmundjes, tregojnë që janë në rritje. Sipas ekspertëve, një situatë e tillë krijon pamundësi që ne të zhvillojmë mësimin në ambientet universitare. UT ka marrë masat paraprakisht, para se të fillonte viti akademik. Kemi krijuar një platformë të unifikuar. Platformë që përdoret nga personeli akademik, stafi dhe studentët e Tiranës. Kjo platformë punon përgjithësisht në rregull dhe kemi pjesëmarrje të lartë. Nuk mund të barazojmë mësimin në distancë me atë në auditor. Është mëse e qartë. Kontakti pedagog-student ka ndërveprim më shumë dhe mund të aplikohen forma mësimi që në mësimin online nuk janë të lehta për t’u zhvilluar. Problematika ka. Situata nuk është e njëjtë. Ka një mobilizim të përgjithshëm si të stafeve dhe studentëve. Ky proces mund të zgjasë më shumë nga çfarë kishim parashikuar, po zhvillojmë strategji për forcimin dhe përmirësimin e proceseve mësimore. Është krijuar një grup pune. Kemi krijuar edhe akte se si duhet të përdoret kjo platformë. Ka fakultete që kanë programe të ndryshme studimi. Ne jemi duke ecuar përpara, nuk jemi të papregatitur. Edhe në kushtet e pandemisë, po përpiqemi që mos ta ndërpresim procesin mësimor, por ta zhvillojmë maskimalisht sa më afër interesave të studentëve dhe pedagogëve.”
