Merret në pyetje Shullazi

Kur kanë kaluar më shumë se tre muaj nga arrestimi i Emiljano Shullazit, Gilmando Danit dhe Blerim Shullazit, Prokuroria e Krimeve të Rënda, ende nuk e ka mbyllur dosjen për ta dërguar në Gjykatë. I pari që u mor në pyetje ishte Emiljano Shullazi, ndaj të cilit rëndojnë akuzat e kërcënimit për funksionarët publik, gjobëvenie, shkatërrim prone me eksploziv, si edhe krijim të grupi të strukturuar kriminal. Vetë i pandehuri, nuk pranoi asnjë nga akuzat e ngritura nga organi i Prokurorisë, duke mohuar në mënyrë kategorike kërcënimin e bërë në drejtim të rektorit të Universitetit të Tiranës Mynyr Koni. Të njëjtën qëndrim mohues kanë mbajtur edhe Gilmando Dani e Blerim Shullazi, të cilët akuzohen se kanë shtrënguar me anë të kanosjes disa biznesmenë për dhënie pasurie. Ditën e enjte, Prokurorja do të kërkojë ballafaqimin ndërmjet tre të akuzuarve.