Izraeli kreu bombardimet më të rënda që nga fillimi i armëpushimit në Gaza më 19 janar, gjatë natës. Të paktën 330 persona mbetën të vrarë.
“Ministria e Shëndetësisë ka regjistruar më shumë se 330 të vdekur, shumica prej tyre fëmijë dhe gra, dhe qindra të plagosur, dhjetëra prej të cilëve janë në gjendje kritike”, tha për AFP drejtori i Ministrisë së Shëndetësisë Mohamed Zakout.
Sipas ushtrisë izraelite, sulmet do të vazhdojnë për aq kohë sa të jetë e nevojshme dhe do të zgjerohen. Sipas Reuters ky raport lë të hapur mundësinë e rifillimit të operacioneve tokësore nga trupat izraelite. Nga ana e tij, Hamasi, përmes një zyrtari të lartë që foli për Agjencinë Franceze të Lajmeve, akuzoi Izraelin se ka vendosur të sakrifikojë pengjet duke rifilluar bombardimet.
“Vendimi i Netanyahut është një dënim me vdekje kundër pengjeve,” tha një zëdhënës i Hamasit.
Ai gjithashtu akuzoi Izraelin për përfundimin e njëanshëm të armëpushimit dhe u ka kërkuar ndërmjetësuesve, Egjiptit, Katarit dhe SHBA-së, që të jenë përgjegjës për të.
Pak orë pas bombardimeve të rënda, IDF lëshoi një deklaratë për evakuimin e menjëhershëm të zonave të Rripit të Gazës, duke shpallur Beit Hanoun, Khirbet Khuza’a, Abasan al-Kabira dhe al-Jadida “zona të rrezikshme lufte”.
Vdiq ministri i Brendshëm i Hamasit
Në të njëjtën kohë, Hamasi njoftoi vdekjen e gjeneralit Mahmud Abu Watfa, i cili ishte kreu i Ministrisë së Brendshme të qeverisë së organizatës palestineze në Gaza. Gjenerali Abu Watfa, u vra në një sulm në qytetin e Gazës, sipas dy burimeve të AFP.
Vendimi i Netanyahut dhe njoftimi i SHBA
Kryeministri izraelit Netanyahu dhe ministri i Mbrojtjes Israel Katz kanë urdhëruar ushtrinë të ndërmarrë “aksione të forta kundër organizatës terroriste Hamas në Rripin e Gazës”, sipas një deklarate nga zyra e ish-kryeministrit të lëshuar në orët e hershme të mëngjesit të sotëm.
Ky vendim pasoi “refuzimin e përsëritur të Hamasit për të liruar pengjet tanë” dhe “refuzimin e tij të të gjitha propozimeve të marra nga i dërguari i posaçëm presidencial amerikan Steve Witkoff dhe ndërmjetësit”, shtoi zyra e kryeministrit Netanyahu.
Me miratimin e lidershipit politik, forcat e armatosura izraelite “po kryejnë sulme të gjera kundër objektivave terroriste që i përkasin organizatës terroriste Hamas në Rripin e Gazës”, njoftuan përmes Telegramit Forcat Ajrore izraelite dhe shërbimi i sigurisë së brendshme (Shin Bet).
“Izraeli tani e tutje do të veprojë me vendosmëri kundër Hamasit me forcë të shtuar ushtarake”, thuhet në deklaratën e zyrës së kryeministrit Netanyahu, e cila sqaron se plani operacional i është paraqitur qeverisë gjatë fundjavës dhe ka miratimin e saj.
Një zëdhënës i presidentit amerikan tha për Fox News se qeveria izraelite ishte konsultuar me Presidentin Donald Trump përpara bombardimeve të sotme./vizionplus.tv
