Zyra e Brendshme në Britani ka caktuar të paktën 700 milionë paund për të menaxhuar ardhjen e emigrantëve me varka të vogla deri në vitin 2030.
Zyrtarët publikuan parashikimet në internet javën e kaluar, ndërsa Sekretari i Brendshëm James Cleverly fluturoi në Ruandë për të nënshkruar një traktat të ri për të “ndaluar anijet”.
Ata parashikojnë se kalimet e Kanalit mund të vazhdojnë deri në vitin 2034.
Një zëdhënës i Home Office tha se do të ishte “e papërshtatshme të komentohej” mbi një projekt prokurimi në vazhdim, shkruan BBC.
Por informacioni i disponueshëm publikisht, në faqen e internetit të kontratave të qeverisë, tregon se Home Office dëshiron të paktën një partner të madh për të ndihmuar në drejtimin e dy projekteve të mëdha për emigrantët deri të paktën në vitin 2030.
Objekti i parë që Ministria e Brendshme po kërkon është baza e shpëtimit dhe e mbërritjeve të Forcave Kufitare të Mbretërisë së Bashkuar në portet e Doverit, e njohur si Western Jet Foil.
Ky është një objekt i sigurt ku emigrantët e shpëtuar nga Kanali Anglez nxirren fillimisht në breg, regjistrohen dhe u jepet trajtim urgjent mjekësor.
Pjesa e dytë e kontratës mbulon qendrën shumë më të madhe dhe të kritikuar më parë Manston, e cila ishte projektuar për të akomoduar deri në 1600 emigrantë, ndërsa zyrtarët përcaktojnë se ku t’i strehojnë ata.
“Qëllimi i këtyre qendrave është të sigurojnë një mjedis të sigurt, duke i lejuar Forcave Kufitare të përpunojnë ardhjet me dinjitet dhe respect”, thuhet në faqen e internetit.
Sipas planit, shpjegon faqja, partnerët e Home Office do të kryejnë shërbime të gjera “përfundimtare” në të dy vendet, duke përfshirë kateringun, sigurinë dhe mbështetjen mjekësore.
Zyrtarët kanë llogaritur se këto shërbime do të kushtonin 700 milionë paund gjatë gjashtë viteve të para, dhe kontratat mund të zgjateshin edhe me katër të tjera.
Nëse kostot vjetore mbeten të njëjta, qeveria mund të përgatitet të paguajë të paktën 1.16 miliardë paund gjatë 10 viteve , megjithëse kjo shifër nuk shfaqet në materialin e disponueshëm publikisht.
