Meksikë, përmbyset autobusi me turistë
Të paktën 12 turistë kanë humbur jetën në Meksikë, ndërsa disa të tjerë janë lënduar, pasi autobusi me të cilin udhëtonin është përmbysur.
Ngjarja e rëndë ka ndodhur në një autostradë në lindje të Meksikës.
Mediat vendase raportojnë se në mesin e turistëve ka 7 shtetas amerikanë, 2 suedezë, italianë dhe kanadezë, mes tyre dhe një fëmijë 5 vjeçar.
Sipas policisë, autobusi me 31 turistë kishte zbritur nga një kroçierë dhe po drejtohej për në qytetin e lashtë Maja.
Ende nuk është e qartë se çfarë mund të ketë shkaktuar incidentin, por dyshimet e para janë se autobusi mund të ketë pasur një defekt teknik, gjë e cila shkaktoi tragjedinë.
Autoritetet kanë nisur hetimet për zbardhjen e plotë të ngjarjes, por, ajo që shton më shumë dyshimet, është se pas aksidentit fatal, shoferi i autobusit është larguar në drejtim të paditur.
Vendi turistik është i populluar këtë sezon për shkak të pushimeve të krishtlindjeve dhe Vitit të Ri. Kjo nuk është hera e parë që grupe turistësh aksidentohen për vdekje, dhe sipas autoriteteve, udhëtimet e gjata natën vonë, mund të jenë shkaktari kryesor i tyre.
