Kreu i Partisë Republikane Fatmir Mediu ka zhvilluar një takim me banorët e njësisë numër 5 në Tiranë.
Mediu u bëri thirrje qytetarëve që në zgjedhjet vendore të 14 majit të votojnë PR-në, ndërsa theksoi edhe domosdoshmërin e angazhimit të rinisë në politikë.
Sipas tij, vendoret e 14 majit kanë një rëndësi më të madhe sesa thjesht të zgjedgësh një kryetar bashkie.
“Në 33 vite politikë kam parë, kemi ecur përpara, pastaj kemi shkuar mbrapa e kështu me radhë. Por ajo që më bën të besoj sinqerisht që Shqipëria ka të ardhme është kur shikoj Albin, Dianën, Mikaelën, Sentin, Donaldin, Sandrin, të gjithë ju, që doni të angazhoheni, dhe ju kërkoj sinqerisht me insistim, angazhohuni, mos rrini indiferentë.
Zgjedhjet e 14 Majit kanë një rëndësi shumë më të madhe sesa thjesht kush do të jetë kryetar bashkie. Është momenti i një sfide ndërmjet të mirës dhe të keqes, të njerëzve që duan që atë që ju ka falur Zoti, mundësitë, liritë, të gjitha këto potenciale që ka Shqipëria, t`i kthejnë në mundësi për të zhvilluar ekonominë e tyre familjare dhe të ndërtojnë jetesën këtu në Shqipëri, përballë të keqes që po e shkatërron cdo ditë e më shumë të ardhmen tonë.
Largimi i shqiptarëve nga Shqipëria, sidomos i të rinjve dhe të rejave, i profesionistëve, ka krijuar një plagë shumë të madhe familjare, sociale, ekonomike dhe politike.
Ne jemi përballë një situate jashtëzakonisht të vështirë. Për herë të parë Shqipëria është në një udhëkryq shumë të madh, të shpopullimit dhe të shpërbërjes. Kjo ka qënë një ëndërr dhe e atyre që kanë qënë kundërshtarët tanë si komb. Përballë kësaj situate mendoj që është e domosdoshme t`a kuptojmë rëndësinë e kësaj sfide, të mirës kundër së keqes. Prandaj secili duhet të gjykojë sipas mënyrës së vet”, tha Mediu.
