Mediat greke kanë dhënë detaje të tjera në lidhje me ngjarjen e rëndë të së martes në mbrëmje në Kavala ku u qëllua për vdekje një 18 vjeçar shqiptar.
Portalet dhe gazetat fqinje bëjnë të ditur se një tjetër i ri shqiptar, ka pranuar vrasjen e Marios Isak.
Ato shtojnë se ky person ka deklaruar në polici se ishte në kafe me viktimën dhe kur janë larguar ato janë grindur me njëri tjetrin. Adoleshenti shqiptar emri i të cilit nuk bëhet i ditur ka shtuar se donte vetëm ta trembte shokun e tij Marios Isak, por e ka qëlluar nga frika me armë.
Fillimisht autoritetet greke bënë të ditur se i riu shqiptar ishte qëlluar me dy plumba pas shpine ndërkohë që pati aludime se ai ishte përfshirë në trafik droge. Viktima i lindur në Kavala në vitin 2000 luante futboll me ekipin e këtij qyteti.
Gjatë kësaj të mërkure MPJ e Shqipërisë i kërkoi palës greke zbardhjen e shpejtë të ngjarjes dhe dënoi valën e ekstremizmit dhe urrejtjes të shfaqur, sipas saj kohët e fundit në Greqi ku janë vrarë katër shqiptarë.
