Pandemia e koronavirusit mund të shkaktkojë një rritje të ndotjes së oqeanit. Sipas ambientalistëve, grumbujt e mbeturinave plastike po shtohen dhe kjo rrezikon jetën detare. Ata kanë gjetur të shpërndarë në ujërat e deteve maska që lundrojnë si kandilë deti dhe doreza.
Zhytësit e “Operation Mer Propre”, organizatë jofitimprurëse franeze, gjetën dhjetëra doreza, maska dhe shishe dezinfektantësh në ujërat e Mesdheut. Joffrey Peltier tha se kjo është një gjetje shqetësuese sepse paralajmëron për një lloj të ri ndotjeje.
Vetëm në Francë, autoritetet kanë porositur dy miliardë maska, tha Laurent Lombard për “Opération Mer Propre”.
“Së shpejti ne do të rrezikojmë të kemi më shumë maska sesa kandilë deti dhe peshq në Mesdhe”, u shpreh ajo.
Ambientalistët kanë shpërndarë në rrjetet sociale edhe një video ku duken algat e ngatërruara me dorezat, duke shpresuar se këto pamje do t’i ndërgjegjësojnë njerëzit.
Rreth 13 milionë ton plastikë hyjnë në oqeane çdo vit, sipas një vlerësimi për vitin 2018.
Këto shifra rrezikojnë të rriten ndjeshëm pasi vendet në mbarë botën përballen me pandeminë koronavirus.
“Me një jetëgjatësi prej 450 vjetësh, këto maska janë një bombë ekologjike duke pasur parasysh pasojat e tyre për planetin tone”, tha politikani francez Eric Pauget.
