Një ngjarje e denjë për skenar filmash ka ndodhur pak ditë më parë në Tiranë, ku një 70-vjeçari i janë marrë 100 mijë euro përmes mashtrimit.
Bëhet me dije se 70-vjeçari, i cili kishte një pikë këmbimi valutor, ka pasur një takim të papritur nga i “dërguari” i mikut të tij, i cili i ka kërkuar 100 mijë euro borxh.
Sipas burimeve, 70-vjeçari ka njohje të ngushta me biznesmenin Bashkim Ulaj dhe pikërisht emri i këtij të fundit ka bindur të moshuarin që t’i japë personit që iu paraqit në pikën e këmbimit valutor 100 mijë euro.
Para dorëzimit të parave, 70-vjeçari ka pasur edhe një bisedë me video-thirrje me një person në anën tjetër të telefonit, i cili, i krijuar me inteligjencë artificiale, bindi të moshuarin se këtë bisedë po e zhvillonte me biznesmenin Ulaj.
Pasi kaluan disa orë, i moshuari i ka rënë sërish numrit, por në anën tjetër të telefonit nuk i është përgjigjur askush. Më pas, ai ka telefonuar biznesmenin Ulaj dhe ky i fundit i ka thënë se nuk është në dijeni të situatës.
Menjëherë, 70-vjeçari ka telefonuar policinë. Krimi Ekonomik pranë Policisë së Tiranës nisi hetimet, ku, përmes kamerave të sigurisë, arriti të lokalizonte edhe mjetin që përdorën autorët, mjet i cili rezultoi i marrë me qira. Ndërkohë, më pas, blutë arritën të identifikojnë autorët, të cilët janë nga Elbasani.
