Kryeministri Edi Rama, gjatë një takimi me simpatizantët, anëtarët dhe themeluesit e PS-së së Fierit, në kuadër të 35-vjetorit të themelimit të partisë, shkëmbeu disa batuta me të pranishmit.
Rama zbuloi se pse Fieri cilësohet si kryeqyteti i socialistëve. Sipas tij, vetëm nëse merr zemrën dhe mbështetjen e fierakëve mund të quhesh se ke marrë Partinë Socialiste.
Ndërsa nuk munguan batutat me një nga gratë e pranishme, duke kujtuar periudhën kur Rama mori drejtimin e PS-së.
Pjesë nga biseda:
Rama: Kam zgjidhur një dilemë sot, se pse i thonë Fierit kryeqyteti i socialistëve? E zgjidha duke parë Sokratin. Kur unë kandidova për herë të parë për kryetar të PS-së, ishte një skandal i madh, pasi PS-ja nuk e kishte zakonin dhe as statutin që të kishte njerëz që thonin: ‘Dua të bëhem kryetar i PS-së’.
Ndërkohë ishte skandal pasi unë isha kryetar i Bashkisë së Tiranës. Ishte pas fitores së mandatit të dytë në 2003-in dhe socialistët më shikonin si një njeri që ishte komplet i pafytyrë dhe gati-gati tradhtar, sepse po i dilte përballë liderit të pakontestueshëm të partisë, duke thyer çdo rregull, duke u bërë anëtar partie sot e duke kandiduar po sot.
Sistemi i PS-së ishte me ato komitete drejtuese të rretheve, ku nuk mund të hynte e të dilte kush të donte. Aty s’kishte as kamera, as media; mbahej raporti dhe votohej për delegatët.
Vij unë të futem. Ky komiteti drejtues ishte ai i Mallakastrës. Shkoj unë të futem që të shpall platformën dhe te dera del shoku Sokrat: ‘Urdhëroni!’, tha.
I them unë: ‘Më thanë që këtu është Komiteti, dua të futem se jam kandidat.’
‘Jo’, tha, ‘s’ka kandidat të PS-së, kandidatët dalin në Kongres.’
I them unë: ‘Po si do dal kandidat në Kongres po s’më dëgjuat?’
Më tha Sokrati: ‘Unë do tërhiqem, do flas me përfaqësinë dhe do të jap përgjigje.’
Unë në rrugë, vjen shoku Sokrat me letër me vulë e më thotë: ‘Në bazë të nenit kaq e aq, nuk të lejohet futja në Komitet.’
Pastaj e çava në ca komitete të tjera, historia vazhdoi dhe unë u bëra kryetar i PS-së.
Unë u bëra kryetar i PS-së në Tiranë. Grupi i Fierit, megjithëse më votuan, shoku Sokrat erdhi atje dhe tha: ‘Votën ta dhamë, herën e parë nuk ishe gati, tani do të të shikojmë.’
Aty ishte i gjithë grupi i Fierit. Ishte një grua, Rajmonda Stefa. Ta shikosh, thua grua e mirë, e dashur, komunikuese. Rajmonda Stefa ma ka bërë malore jetën që të bindja PS-në e Fierit se isha i duhuri.
Vetëm mbas disa kohësh të gjithë ishin dorëzuar, më prisnin me përqafime, kur fitova edhe zemrën e Rajmondës dhe Petros e ca të tjerëve, u bëra kryetar.
Kush ka mbështetjen, simpatinë, energjinë dhe mbi të gjitha kush ka PS-në e Fierit si organizatë, jo thjesht si frymë, atëherë mund të thotë se ka me vete kryeqytetin e PS-së.
Rajmonda: Të them të vërtetën, i thashë unë: për të dashuruar si kryetar partie kam dashuruar Fatosin dhe Alqin që kam në shtëpi.”
Rama: Nuk e mbaja mend kështu. Dashurinë me shokun Fatos e ka pasur të shpallur, atë me burrin nuk ia ka mohuar njeri. Por unë s’kërkoja dashurinë e Rajmondës, por mbështetjen. Mbështetjen ma dha, tani ma dha edhe dashurinë, por të fshehur.”
