Kryedemokrati Sali Berisha, gjatë fjalës së tij në “Foltoren” e radhës përballë kryeministrisë, ka përshëndetur zgjedhjet në Kosovë.
Ai tha se, ndryshe nga Shqipëria, Kosova tregon kulturë dhe demokraci në zgjedhje, duke ecur me hapa gjigantë drejt Bashkimit Evropian.
“Shikoni Kosovën! Krenari për çdo shqiptar është Kosova. Krenari e madhe, por edhe shpresë! Një shtet që shpalli Pavarësinë pak vite më parë, një shtet ku shqiptarët janë shumicë. Një shtet që ecën me hapa gjigantë drejt BE-së. Një shtet që, sipas studiuesve, është vetëm 6 vite larg standardeve evropiane, kundrejt Shqipërisë që është 62 vite larg. Kosova zhvillon zgjedhje. Kryeministri i Kosovës nuk mban koordinatorë krimi, nuk mbjell kanabis, por ndihmon fermerët të mbjellin grurë. Kryeministri i Kosovës nuk ka sipërmarrje, përkundrazi, qeveria atje lufton fort për veprimtarinë më transparente dhe zhvillon dy palë zgjedhje për të zgjidhur çdo krizë e çdo problem në mënyrën më demokratike”, tha Berisha.
Më tej, kryedemokrati theksoi se kjo është protesta e fundit e këtij viti, për t’u rikthyer vitin e ardhshëm me protesta edhe më të forta.
“Ne e mbyllim sot protestën tonë për ta nisur vitin sërish me protesta. Kudo që shkoj, gjej një vendosmëri absolute për t’u ndarë me këtë të keqe sa më shpejt. Shqiptarët presin me padurim largimin e kësaj bande nga pushteti. Ju garantoj se opozita është sot më e fuqishme se kurrë dhe më e vendosur se kurrë për të përmbushur misionin e saj. Askush nuk duhet të harrojë se forca e idealeve është më e madhe se ajo e të gjitha armëve; ata që qëndrojnë për ideale janë të pamposhtur. Ky regjim, çdo ditë e çdo orë që kalon, është në shkrumbim, në kalbëzim dhe në rënie”, tha Berisha.
Më tej kryedemokrati tha se shpresa e vetme për shqiptarët qendron në mendjet, zemrat dhe vendosmërinë e popullit opozitar.
“Ta shndërrojmë këtë dimër në një ngricë përfundimtare për regjimin e kalbur të rilindjes. Rilindja ka vdekur, ne duhet ta gropisim atë. Rama ka vdekur politiksht, ne duhet ta groposim atë”, mbylli fjalën e tij kryedemokrati Sali Berisha.
