Komisioni hetimor për privatizimin e Operatorit të Sistemit të Shpërndarjes së Energjisë nga kompania çeke CEZ, do dorëzojë në Prokurori raportin përfundimtar.
Përgjegjës, sipas mazhorancës, për aferën korruptive të këtij privatizimi, janë zyrtarë të lartë të qeverisë së PD-së, duke filluar nga ish-kryeministri Sali Berisha.
Në prezantimin e raportit përfundimtar, Balla bëri me dije se një kallëzim penal do dorëzohet pranë organit të akuzës, edhe për Shkëlzen Berishën, djalin e ish-kryeministrit Berisha, i cili dyshohet si i përfshirë në aferë. Për kreun e Komisionit, Berisha është prezantuar 4 herë në komision, por ka refuzuar të dëshmojë.
Në raportin e miratuar me votat e deputetëve socialistë, dhe në mungesë të atyre të opozitës, të cilët kanë bojkotuar Parlamentin, thuhet se dëmi i shkaktuar shtetit nga privatizimi në shkelje të ligjit, arrin shumën prej 415 milionë euro.
