Autostradat dhe terrenet sportive të shkollave të Pekinit u mbyllën për shkak të ndotjes së rëndë .
Sipas Byrosë Kombëtare Meteorologjike, njëmjegull e trashë smogu mbuloi pjesë të Kinës veriore, me dukshmëri në disa zona të reduktuara në më pak se 200 metra. Autoritetet e Pekinit ia atribuan situatën “kushteve të pafavorshme të motit dhe përhapjes së ndotjes rajonale”.
Shkollat në kryeqytet u urdhëruan të ndalonin orët e edukimit fizik dhe aktivitetet në natyrë, ndërsa pjesët e autostradave për në qytetet kryesore, përfshirë Shangain, Tianjin dhe Harbin, u mbyllën pas trafikut te krijuar për shkak të dukshmërisë së dobët. Smogu ka të ngjarë të vazhdojë deri të paktën të shtunën në mbrëmje, sipas zyrtarëve të kryeqytetit.
Kina njoftoi në fillim të kësaj jave se ka rritur prodhimin ditor të qymyrit me më shumë se një milion ton për të lehtësuar mungesën e energjisë që ka detyruar fabrikat të mbyllen muajt e fundit.
Ndotja në Pekin e ka çuar përqendrimin e mikrogrimcave Pm2.5, përgjegjëse për problemet e frymëmarrjes, në 224, me skenarë të përkeqësuar deri të shtunën në mbrëmje në një kohë që Organizata Botërore e Shëndetësisë rekomandon se nivelet maksimale të lejueshme janë 15.
Kina, përgjegjësja më e madhe në botë për emetimet e gazeve serrë, është zotuar të arrijë kulmin e tyre deri në vitin 2030 dhe t’i zvogëlojë ato në zero deri në vitin 2060, me pjesën e energjisë së rinovueshme për ta çuar nga 25% në 80% deri në vitin 2060.
Aktualisht, mbi 80% e përzierjes energjetike të vendit mbështetet në lëndët djegëse fosile dhe 60% përbëhet nga qymyri./tgcom
