Kryesia e Partisë Socialiste, ne mbledhjen e mëngjesit të kësaj të hëne, vendosi të thërrasë Asamblenë Kombëtare më datë 2 prill, ndërkohë që në fund të te njëjtit muaj, do të mblidhet kongresi elektoral. Kongresi pritet të miratojë programin elektoral me të cilin do të garojë PS në zgjedhjet e 18 qershorit, si dhe listën e kandidatëve për deputetë, në të gjitha qarqet e vendit.
Procedurat partiake sanksionojnë që në mbledhjen e Asamblesë Kombëtare, do të miratohet zyrtarisht rendi i ditës së punimeve të kongresit elektoral. Forumi më i lartë vendimmarrës në PS, përkon me mbylljen e kësaj legjislature dhe nisjen zyrtarisht të fushatës zgjedhore. Por ndërkohë, prej javësh, koordinatorët e kryesisë së PS dhe deputetët e saj, kanë nisur takimet me bazën, për organizimin e strukturave partiake për zgjedhjet.
