Në Pogradec vijon takimi i drejtuesve politikë të qarqeve dhe kryetarëve socialistë të grupeve parlamentare, ku në qendër të diskutimeve është analiza e dokumentit “Besa”, objektivat e Partisë Socialiste për zgjedhjet lokale të vitit 2027 dhe vizioni “Shqipëria 2030”.
Takimi është hapur nga kryeministri Edi Rama, ndërsa më pas diskutimi ka vijuar me drejtuesit politikë të qarqeve. Ata po analizojnë situatën politike në territoret që mbulojnë dhe po paraqesin sugjerimet e tyre për mënyrën se si Partia Socialiste duhet të qaset gjatë katër viteve të ardhshme.
Një pjesë e diskutimeve lidhet edhe me situatën aktuale politike dhe protestat, ndërsa është theksuar nevoja për një afërsi më të madhe të deputetëve dhe kryetarëve të bashkive me komunitetet dhe qytetarët. Në fokus është gjithashtu strategjia mediatike e PS-së dhe mënyra e komunikimit publik.
Drejtuesit politikë po diskutojnë kryesisht për zgjedhjet lokale të vitit 2027 dhe mënyrën se si Partia Socialiste duhet të organizohet në nivel vendor, me synimin për të ruajtur dhe konsoliduar mbështetjen elektorale.
Takimi në Pogradec pritet të përmbyllet me një tjetër fjalë të kryeministrit Edi Rama, ku pritet të përcaktohen edhe drejtimet kryesore të punës për periudhën e ardhshme.
/vizionplus.tv
