Të paktën 70.000 persona kanë ikur nga shtëpitë e tyre në rajonin jugor të Ukrainës, Herson, brenda një jave, ka thënë administrata e instaluar nga Moska në këtë rajon.

 

“Jam i sigurt që më shumë se 70.000 persona kanë ikur brenda një jave, prej kur janë organizuar largimet”, ka thënë Vladimir Saldo, për një kanal televiziv rajonal, duke iu referuar përpjekjeve të autoriteteve pro-Kremlinit, për të larguar banorët nga zonat afër Lumit Dnjepër.

 

Ai ka shtuar se numri mund të jetë edhe më i madh, sepse njerëzit mund të kenë përdorur anijet e tyre për të kaluar lumin.

 

Banorëve u është bërë thirrje që të largohen, pasi trupat ushtarake ruse janë duke u përballur me kundërofensivën e ushtrisë ukrainase në këtë rajon.

 

Kievi i ka konsideruar këto lëvizje të njerëzve si “dëbime”.

 

Saldo ka thënë të mërkurën se qasja afër lumit është ndaluar për shtatë ditë, “për shkak të situatës së tensionuar”.

 

Ai po ashtu ka pretenduar se ka “rrezik të vërshimeve” dhe “shkatërrimit masiv të infrastrukturës civile”, duke thënë se Kievi është duke u përgatitur që të sulmojë digën Kakhovka që kontrollohet nga forcat ruse në Lumin Dnjepër.

 

Presidenti ukrainas, Volodymyr Zelensky, e ka akuzuar Rusinë se po planifikon të kryejë vetë sulme në këtë digë, për të nxitur vërshime shkatërruese.

Leave a Reply

Your email address will not be published. Required fields are marked *