Mbërrin urdhërarresti për Balilin

Urdhërarresti per Klemend Balilin, mbërrin ne Tirane. Zyra e Interpol Tiranës, ka marrë dokumentin qe pritej nga autoritetet, duke e shpërndarë atë zyrtarisht në të gjitha pikat e kalimit kufitar si dhe gjithë strukturave të policisë. Por ndërsa agjentët vihen në kërkim të balilit, i konsideruari si “Eskobari i Ballkanit” prej ditësh është në arrati, duke mos lënë asnjë gjurmë. Zyrtarisht në sistemin TIMS, nuk rezulton që ai të ketë dalë nga Shqipëria, çka shton dyshimet se ai mund të jetë fshehur në Shqipëri. Por nuk përjashtohet edhe dalja e tij në rrugë ilegale nga vendi drejt një destinacioni deri më tani të panjohur. Ndërkohë mediat greke shkruajnë se në rast arrestimi, Klemend Balili, nuk do të ekstradohet, por do të gjykohet në Shqipëri. Dosja që shoqëron urdhër arrestin për kreun e narkotrafikut mes Shqipërisë dhe Greqisë e më tej edhe në Europe, ka edhe shumë të dhëna që paraqesin përmasat e organizatës kriminale.
Rezulton se rrjeti i drogës do trafikonte ne Francë rreth 60 kg kokainë nëntorin e vitit te kaluar. Por Operacioni dështoi, pas sulmeve terroriste në Paris, te cilat dyfishuan masat e sigurisë. Sipas portaleve greke, te cilat i referohen informacioneve policore, operacioni financohej nga kreu shqiptar i rrjetit, Klemend Balili.
Por ky nuk është i vetmi rast kur grupi tentoi të dërgonte ngarkesa droge në vendet e Bashkimit Evropian.
Në shkurt të 2016, një sasi droge do transportohej nga Spanja për në Itali, por edhe kjo ngarkesë u anulua, për shkak të kontrollit të kamionit nga autoritetet, gjë që krijoi dyshime tek drejtuesit e rrjetit. Per te njëjtin grup, agjentet e Europolit arrestuan në Belgjikë dhe dy vëllezërit Dhimiter e Xhevair Poti. 50-vjeçari me pseudonimin “Walter” drejtonte trafikun e kokainës dhe hashashit për pjesën e Belgjikës, ndërkohë që kujdesej për ngarkesat, pasi zotëronte nje firme transporti.
Gjatë operacionit të EUROPOL dhe kontrolleve u sekuestruan 698 kilogramë hashash në Greqi dhe 96 të tjera në Belgjikë.