Kanë mbërritur mbrëmjen e kësaj të premteje 38 400 dozat e para të vaksinës Astra Zeneca.
Në aeroportin “Nënë Tereza” për të pritur vaksinat ishin të pranishëm kryeministri Edi Rama, ministrja e Shëndetësisë, Ogerta Manastirliu dhe ministri për Rindërtimin, Arben Ahmetaj.
Gjatë fjalës së tij, kryeministri Edi Rama deklaroi se në muajin prill pritet të vijnë edhe 60 mijë doza të tjera vaksinash anti-Covid nga AstraZeneca dhe 30 mijë nga Pfizer.
“Nesër ne do nisim menjëherë vaksinimin e mësuesve dhe pedagogëve. Do ta shtrijmë me shpejtësi në të gjithë vendin procesin e vaksinimit në shkolla, duke i kthyer këto të fundit në pika vaksinimi. Shpresojmë të vijnë shumë shpejt sasi më të mëdha. Në muajin prill presim nga Astrazeneca edhe 60 mijë doza të tjera. Po në muajin prill presim edhe 30 mijë doza të tjera nga Pfizer. Ideja është të kemi një vaksinim intensive që të thyejmë zinxhirin e infektimit dhe të zbusim situatën për tu bërë gati për sezonin turistik”, tha Rama ndër të tjera.
