Mëngjesin e kësaj të diele janë hapur qendrat e votimit për raundin e dytë të zgjedhjeve presidenciale në Mal të Zi. Afro 550 mijë qytetarë kanë të drejtë të shprehin vullnetin e tyre deri në orën 20 të mbrëmjes.
Milo Gjukanoviçi dhe Jakov Millatoviçi përballen mes tyre në balotazh.
Gjukanoviç është udhëheqës i Partisë Demokratike të Socialistëve dhe president aktual i Malit të Zi. 61-vjeçari ka dominuar politikën malazeze për më shumë se 33 vjet.
Ai ka qenë një aleat kryesor i Perëndimit për kundërshtimin e ndikimit rus.
Ndërsa, 37-vjecari Jakov Millatovic, është kandidati i Lëvizjes Evropa Tani, parti e themeluar në qershor të vitit të kaluar.
Ai ka theksuar se dëshiron që Mali i Zi të anëtarësohet në BE, megjithëse disa nga partitë që e kanë mbështetur kandidaturën e tij janë pro-ruse. Këto janë zgjedhjet e shtata presidenciale që nga vendosja e sistemit shumë-partiak në Mal të Zi.
Procesi zgjedhor do të monitorohet nga misionet vëzhguese të ODIHR-it, deputetët e parlamentit europian, Këshilli i Evropës si dhe nga organizatat joqeveritare.