Një person ka humbur jetën dhe 154 të tjerë kanë mbetur të plagosur, nga një shpërthim me bombë i ndodhur në kryeqytetin e Etiopisë, Addis Ababa.
Ngjarja ka ndodhur këtë të shtunë në tubimin e organizuar në sheshin Meskel, ku pjesë ishte dhe kryeministri Abiy Ahmed. Shpërthimi ndodhi në momentin e fjalimit të kryeministrit Ahmed, i cili është larguar nga rojet e tij pa pësuar asnjë dëmtim.
Sipas deklaratës së bërë nga vetë kabineti i kryeministrit ky shpërthim është bërë nga njerëzit që nuk e duan paqen dhe unitetin e shtetit.
“Kjo ngjarje është një iniciativë e forcave të cilat nuk duan që ta bashkojnë Etiopinë”.
Ndërkohë institucionet përkatëse po punojnë për zbardhjen e shkaqeve të shpërthimit dhe identifikimin e personave përgjegjës.
