Të paktën 250 civilë mes tyre edhe 50 fëmijë, kanë vdekur gjatë 24 orëve të fundit pas ofensivës së përgjakshme në Gutan Lindore nga forcat qeveritare siriane.
Avionët luftarakë nuk i kanë ndaluar bombardimet në qytet. Sulmet nga ajri i kanë lënë banorët rreth Damaskut në gjendje terrori.
Gjashtë spitale janë shkatërruar. OKB tha se situata në rajonin i cili kontrollohet nga rebelët, është “përtej imagjinatës”.
Sulmet ajrore vdekjeprurëse nisën të martën duke vrarë më shumë se 100 civilë, ndërsa qindra të tjerë u plagosën. Observatori Sirian për të Drejtat e Njeriut tha se ky është numri më i lartë i vdekjeve dy ditore që nga sulmi kimik i vitit 2013 që la pas qindra viktima.
Ushtria siriane pretendon se po përpiqet të çlirojë zonën nga terroristët.
Forcat pro-qeveritare të mbështetura nga Rusia intensifikuan përpjekjet e tyre për të rimarrë bastionin e fundit të madh të rebelëve gjatë mbrëmjes së të dielës.
Guta Lindore është zona e fundit në lindje të Damaskut nën rrethimin e forcave e presidentit sirian Bashar Al-Assad.
Ndërkohë, organizatat e OKB-së për të drejtat e njeriut vazhdimisht kanë bërë thirrje për një armëpushim të përhershëm.
Të martën, UNICEF shprehu “zemërimin” mbi fëmijët që humbën jetën gjatë valës së fundit të sulmeve.