Me 69 vota pro, 40 kundër dhe asnjë abstenim deputetët në kuvendin e Maqedonisë miratuan kalimin me procedurë të përshpejtuar të projekt-ligjit për ratifikimin e plotë të marrëveshjes së Prespës.
Seanca e sotme nuk ka kaluar pa debate. Deputetët e VMRO DPMNE- së janë përpjekur të shkaktojnë kaos dhe tensione gjatë kohës kur ministri i jashtëm Nikola Dimitrov po mbante fjalën e tij. Opozitarët shpërthyen në akuza për tradhti, duke e quajtur paktin një kushtëzim nga Greqia dhe jo kompromis midis të dyja palëve. Situata e krijuar megjithatë nuk e pengoi mazhorancën që të votonte.
Dimitrov gjatë fjalës së tij tha se procedura e përshpejtuar i shërben perspektivës europiane të vendit.
“Këshilli i qershorit është përpara nesh, ministrat e jashtëm të vendeve anëtare do të takohen më 25 dhe 26 qershor dhe Samiti do të jetë më 28 qershor. Këto data janë çelësi i perspektivës europiane të vendit tonë dhe varen nga ratifikimi i marrëveshjes. Ratifikimi hap mundësinë për qytetarët që të deklarojnë të ardhmen e tyre në referendumin e vjeshtës.”
Tashmë debati zhvendoset në Komisionin për çështje Europiane, i cili ka kohë deri të mërkurën në mesnatë për të shqyrtuar draftin. Pritet që ditën e premte projekt-ligji për ratifikimin e marrëveshjes të shkojë sërish në seancë plenare për votimin përfundimtar.
Ndërkohë në ambientet jashtë kuvendit kanë vijuar protestat të cilat fatmirësisht nuk janë përshkallëzuar në skena dhune. Me thirrjet “mallkuar tradhtarët” demonstruesit janë zhvendosur para zyrës së presidentit Gjorge Ivanov në mbështetje të vendimit të tij për të mos nënshkruar dekretin për çështjen e emrit. Stacioni tjetër ishte selia e VMRO-DPMNE ku protestuesit kërkuan që deputetët e opozitës të largohen nga Parlamenti dhe të bashkohen me protestën, si dhe të mos lejojnë zbatimin e ndryshimit te emrit.
