Gazment Bardhi do të mbledhë ditën e nesërme grupin e deputetëve të opozitës, për të njohur ata me vendimet e marrë në Konferencën e Kryetarëve gjatë ditës së sotme.
Në sms-në nisur deputetëve Bardhi njofton mbledhje grupi ditën e mërkurë, për të njohur ata me vendimet e marra këtë të martë në Konferencën e Kryetarëve, e cila do të rimblidhet sërish nesër në orën 13:30 pas mbledhjes së grupit.
Në mesazhin drejtuar deputetëve Bardhi shkruan se sot në Konferencën e kryetarëve u ra parimisht dakord që të ushtrohet e drejta e opozitës për ngritjen e Komisioneve Hetimore, duke filluar në këtë sesion parlamentar me ngritjen e 2 Komisioneve Hetimore që u rrëzuan në 12 Tetor, duke u tërhequr nga vendimet në atë seancë.
SMS e Bardhit për deputetët e opozitës:
Në parim në Konferencën e Kryetarëve u ra dakord:
Të ushtrohet e drejta e opozitës për ngritjen e Komisioneve Hetimore, duke filluar në këtë sesion parlamentar me ngritjen e 2 Komisioneve Hetimore që u rrëzuan në 12 Tetor, duke u tëhequr nga vendimet në atë seancë.
Të ngrihet me vendim të Kuvendit një Nënkomision për Reformat, që përbëhet nga 4 anëtarë (2 GPPS – 2 GPPD). Ky nënkomision është përgjegjës për diskutimin/shqyrtimin e paketave ligjore, reformave dhe ligjeve që kërkojnë shumicë të cilësuar apo ligjeve që kërkojnë gjithëpërfshirje, përfshirë ligjet që janë të nevojshme për procesin e integrimit europian. Komisioni merr vendimet me konsensusin e të gjithë anëtarëve dhe më pas i kalon aktet e dakordësuara për shqyrtim/miratim në seancë plenare.
Konferenca e Kryetarëve, me propozimin e përfaqësuesve të opozitës, miraton një kalendar konkret për shqyrtimin, diskutimin dhe votimin e ligjeve të propozuara nga deputetët. Kryetarja e Kuvendit kujdeset që Komisionet Parlamentare të zbatojnë kalendarin konkret të miratuar nga Konferenca e Kryetarëve.
Do të punohet për projektvendimet gjatë ditës dhe më pas do të ketë nesër në 13:30 një tjetër mbledhje të Konferencës së Kryetarëve.
