Ministrja e Jashtme, Olta Xhaçka përshëndeti marrëveshjen për vendosjen e marrëdhënieve diplomatike mes Kosovës dhe Izraelit. Sipas Xhaçkës, kjo marrëveshje e bën rajonin më të sigurt. Ajo konsideron këtë një ngjarje historike.
“Vendosja e marrëdhënieve diplomatike mes Kosovës dhe Izraelit 🇽🇰🤝🇮🇱 është një tjetër konfirmim se Kosova shtet është një realitet i patjetërsueshëm. Rajoni ynë është sot më i sigurt dhe i qëndrueshëm. Kjo ngjarje historike konfirmon edhe njëherë miqësinë midis dy kombeve shqiptaro-izraelite. Mirënjohje dhe falenderim për Shtetet e Bashkuara të Amerikës 🇺🇸 për të gjithë mbështetjen”, shkroi Olta Xhaçka në “Facebook”.
Kosova dhe Izraeli, në një ceremoni virtuale formalizuan marrëdhëniet diplomatike këtë të hënë.
Ministrja në Detyrë e Punëve të Jashtme dhe Diasporës, Meliza Haradinaj-Stublla dhe ministri i Punëve të Jashtme të Izraelit, Gabriel Ashkenazi nënshkruan dokumentin, ku thuhet se të dyja shtetet vendosin marrëdhënie diplomatike, me qëllim që të rrisin bashkëpunimin bilateral.
