Çmimet e naftës ranë ndjeshëm të mërkurën, duke zbritur nën nivelin 100 dollarë për fuçi, pasi presidenti amerikan Donald Trump njoftoi arritjen e një armëpushimi dyjavor me Iranin.
Marrëveshja lidhet me rihapjen e menjëhershme të Ngushticës së Hormuzit, një rrugë detare ku kalon rreth 20% e naftës botërore.
Nafta Brent me 14.51 dollarë, ose 13.3%, duke arritur në 94.76 dollarë për fuçi. Ndërkohë, West Texas Intermediate (WTI) ra me 17.16 dollarë, ose 15.2%, duke zbritur në 95.79 dollarë për fuçi.
Vendimi i Trump erdhi pak para afatit që ai i kishte vendosur Iranit për hapjen e ngushticës, duke paralajmëruar më herët për pasoja të rënda në rast refuzimi. Në një postim në rrjetet sociale, ai e cilësoi marrëveshjen si një “armëpushim të dyanshëm”.
Nga ana tjetër, Irani deklaroi se do të ndalonte sulmet nëse edhe sulmet ndaj tij ndërpriteshin, duke shtuar se kalimi i sigurt në Ngushticën e Hormuzit do të garantohej për dy javë në koordinim me forcat e tij të armatosura.
Megjithatë, tensionet në rajon mbeten të larta. Disa shtete të Gjirit kanë raportuar lëshime raketash dhe sulme me dronë, ndërsa qytetarëve u është kërkuar të strehohen.
Trump bëri të ditur se SHBA ka marrë një propozim me 10 pika nga Irani, të cilin e konsideron bazë të mirë për negociata drejt një marrëveshjeje afatgjatë paqeje.
Konflikti SHBA-Izrael me Iranin kishte shkaktuar rritjen më të madhe mujore të çmimit të naftës në histori gjatë muajit mars, me mbi 50%.
