Mario Draghi fiton votëbesimin në Senatin italian

Kryeministri, Mario Draghi dhe kabineti i tij fituan me lehtësi besimin e Senatit, 262 senatorë votuan pro ekonomistit italian për ta nxjerrë ai vendin nga kriza, ndërsa 40 e kundërshtuan.

Në fjalën e tij, Draghi e konsideroi detyrim dhe jo zgjedhje, unitetin përballë pandemisë, raporton Vizion Plus.

MARIO DRAGHI

KRYEMINISTER I ITALISE

 

 “Detyra kryesore që na kërkohet, dhe sidomos mua si kryeministër, është ta luftojmë pandeminë me çdo mjet, të shpëtojmë jetën e qytetarëve tanë. Po ashtu, ta rindërtojmë vendin. Kjo është një mundësi e pashembullt për të krijuar një botë më të barabartë, më të qëndrueshme dhe më të shëndetshme për brezat e ardhshëm. Sot uniteti nuk është një emocion, është një detyrë. Një detyrë që udhëhiqet nga ajo që na bashkon të gjithëve: dashuria për Italinë”.”

Kryeministri Draghi ka premtuar reforma në sistemin fiskal dhe atë të drejtësisë, rritje të investimeve në arsim dhe shkencë, dixhitalizim të administratës publike dhe prirje pro BE-së. Një kabinet me 23 ministra politikë dhe teknikë është caktuar për t’i vënë idetë në zbatim.

Qeveria Draghi u betua para Presidentit Mattarella gjatë fundjavës duke pasuar qeverinë e Giuseppe Conte një nga kryeministrat më popullorë që nga qershori i vitit 2018, i cili u dorëhoq pasi humbi mbështetjen e aleatëve.