Në kuadër të Samitit të Diasporës 2026, organizuar në Pallatin e Kongreseve, Concord Group prezantoi me sukses një nga projektet më ambicioze “Marina Orikum”, një investim strategjik i pozicionuar në Gjirin e Vlorës, që synon të riformësojë hartën e zhvillimit turistik dhe ekonomik të vendit.
Pjesëmarrja në këtë ngjarje të rëndësishme, e cila mblodhi përfaqësues të diasporës shqiptare nga e gjithë bota, shërbeu si një platformë ideale për të prezantuar potencialin e këtij projekti dhe për të nxitur dialogun mbi mundësitë konkrete të investimit në Shqipëri.
Në stendën prezantuese, Concord Group ekspozoi maketin arkitektonik të “Marina Orikum”, një koncept i realizuar nga arkitekti austriak Chris Precht, i njohur për qasjen e tij inovative dhe të qëndrueshme. Dizajni i projektit ndërthur në mënyrë harmonike arkitekturën moderne me peizazhin natyror të zonës, duke reflektuar një vizion të qartë për zhvillim të qëndrueshëm dhe turizëm elitar.
“Marina Orikum” është konceptuar si një ekosistem i integruar, që përfshin rezidenca luksoze, shërbime të standardeve të larta dhe infrastrukturë moderne për jahte dhe aktivitete detare.
Interesi nga pjesëmarrësit ishte i lartë, me fokus të veçantë jo vetëm tek aspekti estetik dhe arkitektonik i projektit, por edhe tek potenciali ekonomik. Investitorë dhe përfaqësues të diasporës diskutuan mundësitë që ofron tregu shqiptar i pronave, veçanërisht në projekte të këtij niveli.
Iniciativa si “Marina Orikum” e bëjnë Shqipërinë më terheqëse si destinacion turistik, por forcojnë gjithashtu lidhjet me diasporën, duke krijuar mundësi konkrete për përfshirjen e saj në zhvillimin e ekonomisë kombëtare.
Prezenca e Concord Group në Samitin e Diasporës 2026 konfirmon angazhimin e grupit më të madh të investimeve për të sjellë në Shqipëri projekte me standarde ndërkombëtare dhe për të kontribuar në zhvillimin afatgjatë të sektorit turistik dhe ekonomik të vendit. “Marina Orikum” pritet të jetë një nga pikat kyçe në këtë vizion, duke ofruar jo vetëm vlerë investimi, por edhe një përvojë të re jetese në bregdetin shqiptar.
